Xəbərlər 23.05.2024 20:51 1553

Şimali Kiprdən olan şəhid ailələri ilk dəfə Qarabağdadır - FOTOLAR

Şimali Kipr Türk Respublikasından olan şəhid ailələrindən və ictimai xadimlərdən ibarət nümayəndə heyəti bu gün Qarabağda olub. 20 nəfərlik heyətin 12 nəfəri şəhid ailələrinin üzvləridir. Heyətə ŞKTR Prezidentinin QHT-lərlə əlaqələr üzrə müşaviri Latif Akça, ŞKTR-nin “Şəhid ailələri və Qazilər Dərnəyi”nin sədri Gürsel Benan, Əlillər Komitəsinin sədri Ahmet Akdeniz, ŞKTR-nin Türk Dövlətləri Dərnəyinin sədri Ali Akın Önder, Girne Amerikan Universiteti dekanı Boğaçhan Bayülken, ŞKTR İTÜ baş katibi Dursun Koç, “Rauf Denktaş Düşüncələrini Yaşatma Dərnəyi”nin baş katibi Selim Terzi və digər şəxslər də daxildir.

Onları Azərbaycandan olan şəhid ailələrinin üzvləri də müşayiət edib. Günün ilk yarısında heyət Şuşa şəhərində olub. Şuşa ilə tanışlıqdan sonra Xocalıya baş çəkilib. Xocalıda aşkar olunan kütləvi məzarlıq ziyarət edilib.

Günün ikinci yarısında nümayəndə heyəti Ağdam şəhərini ziyarət edib. Ağdam Şəhidlər xiyabanında olan qonaqlar daha sonra Azərbaycan Respublikasının Prezidentinin Ağdam, Füzuli və Xocavənd rayonlarında xüsusi nümayəndəsi Emin Hüseynov ilə görüşüb. Görüş zamanı ölkəmizdə qonaq olan ŞKTR nümayəndə heyətini salamlayan Emin Hüseynov onlara Ağdam və Füzuli şəhərlərinin baş planları barədə məlumat verib.

Azad edilmiş ərazilərdə dağıntıların miqyası və quruculuq işlərinin sürəti heyəti heyrətə gətirib.

Səfər “Zəfər" Şəhid Ailələrinə Dəstək İctimai Birliyinin icra etdiyi “Türk dünyasının şəhid ailələri arasında əlaqələrin inkişafı” layihəsi çərçivəsində təşkil olunub. Layihənin donoru Qeyri-Hökumət Təşkilatlarına Dövlət Dəstəyi Agentliyidir.

Qeyd edək ki, Şimali Kipr Türk Respublikasından və Azərbaycandan şəhid ailələri QHT-lər xətti ilə qarşılıqlı səfərlərə başlayıb. Bu ilin iyul ayında Qarabağ uğrunda şəhid olmuş 30 nəfər şəhidin övladı da Şimali Kiprə səfər edəcək və orada yay düşərgəsində iştirak edəcək.


Paylaş
QHT TV
Elanlar
Son xəbərlər
Qrantlar
Təbriklər
Başsağlığı