Vüqar Bayramov Azərbaycan Prezidenti İlham Əliyevin Pakistan səfərindən danışıb
Azərbaycan Prezidenti İlham Əliyev qardaş Pakistanda rəsmi səfərdədir. Pakistan Azərbaycanın haqq işinə hər zaman dəstək olan dövlətlərdəndir. Son illər iki ölkə arasında həyata keçirilən rəsmi səfərlər dövlətlərin qarşılıqlı münasibətlərinin daha da güclənməsinə töhvə verməkdədir.
QHT.az xəbər verir ki, deputat Vüqar Bayramov bildirib ki, iki ölkə arasında iqtisadi əlaqələrin daha da dərinləşdirilməsi üçün ciddi potensial var: "2023-cü ildə Azərbaycan ilə Pakistan arasındakı ticarət dövriyyəsində əvvəlki ilə nisbətən cüzi dəyişiklik olsa da 2021-ci il ilə müqayisədə dövriyyə 2.3 dəfə artıb. 2021-ci ildə 11.7 milyon dollar olan ticarət dövriyyəmiz ötən il 27 milyon dollaradək yüksəlib. Bu isə münasibətlərin inkişaf dinamikasını göstərir".
Deputat qeyd edib ki, tərəflər arasında ticarət dövriyyəsinin artırılması üçün daha böyük potensial var, Azərbaycan Prezidentinin səfəri zamanı təşkil ediləcək müzakirələr və imzalanan sənədlər bu imkanlardan daha çox faydalanmağa şərait yaradacaq: "Bu baxımdan, Azərbaycan Prezidentinin Pakistan səfəri ölkələr arasında münasibətlərin inkişafında yeni mərhələ olacaq. Bu səfər strateji münasibətlərimizin daha da dərinləşməsinə xidmət edəcək".