Ən gənc şəhidlərdən olan Cəbrayıl Dövlətzadənin doğum günüdür - QHT sədrindən şeir
Bu gün Vətən müharibəsinin ən gənc şəhidlərindən olan Cəbrayıl Dövlətzadənin doğum günüdür.
QHT.az xəbər verir ki, o, 2001-ci ilin 11 sentyabrında Sumqayıtın Corat qəsəbəsində anadan olub. 2019-cu ildən Sərhəd Qoşunlarının sıralarında həqiqi hərbi xidmətə başlayan Cəbrayıl, 2020-ci ilin 27 sentyabrında başlayan Vətən müharibəsində Murovdağ istiqamətində döyüşüb və 28 sentyabrda Kəlbəcər rayonu ərazisində şəhid olub. Cəbrayıl Dövlətzadə İkinci Fəxri xiyabanda dəfn edilib və ölümündən sonra "Azərbaycan Bayrağı" ordeni, "Vətən uğrunda" və "Kəlbəcərin azad olunmasına görə" medalları ilə təltif edilib.
"Kitab Evi" İctimai Birliyinin sədri Adilə Nəzərin Şəhid Cəbrayıl Dövlətzadənin xatirəsinə "BU ZƏFƏR SƏNİNKİDİR" şerini təqdim edirik.
Zəfər tək mənim deyil,
sənin zəfərindi bu,
Ruhunla, əqidənlə
dupdurusan, dupduru.
Bu zəfər səninkidir, -
mən sənin qeyrətinə,
sənin şücaətinə
hər gün bir şeir yazıb
belə dil-dil ötürəm.
Mübarizin, Poladın,
minlərlə Şəhidimin
qanına girən itin –
erməni generalın
boğazını sıxan o
əllərindən öpürəm.
Ey on doqquz yaşında
igid oğul, pir dədə,
bu zəfər səninkidir,
Cəbrayıl Dövlətzadə!
Bütün şəhidlərimizin ruhu şad olsun!