Şəhidimiz polkovnik-leytenant Həmdəm Ağayevin doğum günüdür
Azərbaycan Silahlı Qüvvələrinin polkovnik-leytenantı olan Həmdəm Ağayev 1975-ci il sentyabrın 9-da Ağdam rayonunun Sırxavənd kəndində anadan olub.
QHT.az xəbər erir ki, 1993–1994-cü illərdə Birinci Qarabağ müharibəsində Ağdərə rayonunun müdafiəsi uğrunda döyüşlərdə iştirak edib. 1994-cü ilin mayında müharibənin bitməsindən sonra Həzi Aslanov adına Bakı Ali Birləşmiş Komandanlıq Məktəbinə daxil olan Həmdəm Ağayev, 1999-cu ildə ali hərbi təhsilini bitirib və ordu sıralarında xidmətə başlayıb. O, 2003-cü ildə "baş leytenant", 2004-cü ildə "kapitan", 2006-cı ildə "mayor", 2012-ci ildə isə "polkovnik-leytenant" hərbi rütbəsi alıb. 2018-ci ildən 4-cü Ordu Korpusunun Qərargah rəisi vəzifəsində xidmət edən Həmdəm Ağayev 2020-ci ilin 27 sentyabrında başlanan Vətən müharibəsi zamanı Füzuli istiqamətində gedən döyüşlərdə iştirak edib və 9 oktyabr tarixində bu istiqamətdəki döyüşlər zamanı qəhrəmancasına şəhid olub.
Həmdəm Ağayev göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "Vətən uğrunda", "Füzulinin azad olunmasına görə" medalları və “Azərbaycan Bayrağı” ordeni ilə təltif edilib.
Ruhu şad olsun!