İctimai Birlik gənclərin hibrid təhdidlərin bütövlükdə dünya üçün təhlükə olması istiqamətində maarifləndirilməsi işini davam etdirir.

QHT.az xəbər verir ki, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə  “Yeni Fikir” JHİB tərəfindən həyata keçirilən “Hibrid təhdidlərə qarşı yerli mediada iş”  layihəsi çərçivəsində Zaqatala rayonu, Mamrux kəndində “Xarici müdaxilələr və hibrid təhdidlər” mövzusunda “Dəyirmi masa” keçirildi.

İştirakçılar  Qarabağ uğrunda həyatını qurban verən şəhidlərin ruhunu bir dəqiqəlik sükutla yad etdi.

Tədbiri giriş sözü ilə açan layihənin rəhbəri  Elmira Mehdiyeva iştirakçıları layihənin məqsəd və məramı  ilə tanış etmişdir. Qeyd etmişdir ki, Azərbaycan Respublikası davamlı inkişaf yolunda tarixi nailiyyətlər əldə edərək dünya birliyində böyük nüfuz qazanıb. Təəssüf ki, bunları həzm edə bilməyən, erməni lobbisinin təsiri altında olmaqla ikili standartlar mövqeyi tutan bəzi Qərb dairələri xarici müdaxilələr və hibrid təhdidlər vasitəsilə Azərbaycana qarşı təzyiq göstərməyə çalışırlar. Layihənin məqsədi hakimiyyətin əldə etdiyi uğurlara kölgə salmaq istəyənlərin çirkin məqsədlərini iştirakçılara çatdırmaqdır.

Təlimçi İbrahim İbrahimov  çıxış edərək demişdir: bu gün bütün dünyada informasiya müharibəsi gedir. İnformasiya müharibəsində əsas diqqət bilavasitə insanların fikir və davranışlarına təsir etməyə yönləndirilir. Bu məqsədlə mediadan, sosial şəbəkələrdən fəal şəkildə istifadə edilir.  Yayılan xəbərlər dezinformasiya olur. Məqsəd isə dezinformasiyalar vasitəsi ilə  qarşı tərəfi çaşdırıb onun real vəziyyəti obyektiv qiymətləndirməsinə çətinlik yaratmaqdan ibarətdir. Hibrid təhdidlərdə də məhz, dezinformasiyaya əhali arasında narazılıq və çaxnaşma yaratmağın vasitələrindən biri kimi baxılır.  Milli kimliklə, adət-ənənələrlə uzlaşmayan yad dəyərlərin  yayılmasına çalışılır.  Hibrid təhdidlər həm də bütövlükdə dünya ictimaiyyəti üçün təhlükə kimi qiymətləndirilir.

“Dəyirmi masa” iştirakçılarından Vəsilə Hacıyeva, Cəlal Davudoy, Ayan Əhmədova, Güldənə Həsənova və başqaları   öz çıxışlarında bildirmişlər ki, internet, sosial şəbəkələr  həqiqətən, insanların həyatına bir çox mənfi təsirlər göstərir. Ona görə də, ölkənin informasiya təhlükəsizliyi gücləndirilməlidir,  kibermüdafiə sistemləri gücləndirilməlidir, əhalinin  şüur səviyyəsinin yüksəldilməsi və mədəniyyətinin inkişaf etdirilməsi məqsədilə ideoloji təbliğat  təşkil edilməlidir.  QHT-lərin belə layihələri həyata keçirməsi çox təqdirəlayiqdir.

Müzakirələrdə fəal iştirak edən iştirakçıların   sualları  ətraflı cavablandırılmışdır.