Hemofiliyalı Xəstələrin Respublika Assosiasiyasının idarə heyətinin sədri Ayaz Hüseynov, QHT.az-a açıqlama verərək 17 iyun Tibb İşçilərinin Peşə Bayramı münasibətilə bir sıra vacib məsələləri gündəmə gətirib.

Ayaz Hüseynov bildirib ki, hemofiliya və digər qanın laxtalanma pozğunluqlarının müalicəsində dövlətin qayğısı xüsusilə önəmlidir və son illərdə dərman preparatlarının sayının artması bu sahədə müsbət dəyişikliklərə səbəb olub:

"Pasiyentlər həyatı vacib qan laxtalandırıcı faktor konsentratlarının qıtlığını yaşamırlar. Lakin bununla yanaşı, görüləcək yeni işlər də mövcuddur. Hazırda əsas məqsədimiz odur ki, regionlarda yaşayan pasiyentlərin aylıq həyati vacib dərman preparatları rayon mərkəzi xəstəxanalarına çatdırılsın. Çünki pasiyentlərin Bakıya gəlmələri onların həm sağlamlığına, həm də sosial durumlarına ciddi təsir edir. Yeni sistemin qurulması və dərman preparatlarının pasiyentlərə çatdırılması həm pasiyentlərin sağlamlığına müsbət təsir edəcək, həm də dövlət büdcəsi tərəfindən alınan bahalı dərman preparatlarının qənaətinə gətirib çıxaracaq. Həmçinin, bu, ümumilikdə pasiyentlərin sosial durumlarına çox müsbət təsir edəcək."

O, həmçinin qeyd edib ki, son illərdə Hemofiliyalı Xəstələrin Respublika Assosiasiyası, TƏBİB ilə birgə regionlarda təlimlər keçirir. Bu təlimlərdə hemofiliya və digər qan pozğunluğu xəstəliklərindən əziyyət çəkən pasiyentlərin müalicələrinin təkmilləşdirilməsi məqsədilə və çoxdisciplinar müalicə üçün müxtəlif profilli həkimlərlə Bakıdan gələn mütəxəssislər tərəfindən bilik mübadiləsi həyata keçirilir:

"2025-ci ildə də bu təlimləri davam etdirməyi və qısa bir zamanda regionlarda hemofiliyalı pasiyentlərin müalicə keyfiyyətini artırmağı planlaşdırırıq."

Pərvanə Fərhadqızı

QHT.az