Nigeriyanın Rivers ştatında fəaliyyət göstərən Leadership Challenge Foundation qeyri-hökumət təşkilatı sənətkarların peşə bacarıqlarının inkişafı və sahibkarlıq imkanlarının genişləndirilməsi istiqamətində layihələr həyata keçirir.
QHT.az xarici mediaya istinadən bildirir ki, təşkilatın Port Harcourt şəhərində keçirdiyi tədbirlərdə 100-dən çox sənətkar iştirak edib. Proqramın əsas məqsədi iştirakçıların peşə hazırlığını artırmaq, müasir texnologiyalardan istifadə imkanlarını genişləndirmək və onların kiçik bizneslərini inkişaf etdirmələrinə dəstək göstərməkdir.
Tədbirdə dərzilər, qaynaqçılar, dülgərlər, elektriklər, santexniklər və digər peşə sahibləri iştirak ediblər.
Çıxış edən təşkilatın təsisçisi Joy Success-Ikpe sənətkarların ölkə iqtisadiyyatında mühüm rol oynadığını vurğulayıb. O, onların fəaliyyətinin genişləndirilməsi üçün dövlət qurumlarının, biznes strukturlarının və inkişaf tərəfdaşlarının dəstəyinin vacibliyini qeyd edib.
Tədbirdə sənətkarlara biznesin rəsmiləşdirilməsi, məhsulların brendləşdirilməsi, keyfiyyət standartlarının yüksəldilməsi, maliyyə imkanlarına çıxış və yeni bazarlara inteqrasiya ilə bağlı tövsiyələr verilib.
Mütəxəssislər bildiriblər ki, peşə təhsili və davamlı bacarıq inkişafı yalnız fərdi gəlirlərin artmasına deyil, həm də yeni iş yerlərinin yaradılmasına və yerli iqtisadiyyatın güclənməsinə töhfə verir.
Qeyd edək ki, Leadership Challenge Foundation Nigeriyada, xüsusilə gənclər və kiçik sahibkarlar arasında peşə bacarıqlarının inkişafını və sahibkarlığın təşviqini hədəfləyən QHT-dir.
