Venesuelada iyunun 24-də baş verən güclü zəlzələlərdən bir ay keçməsinə baxmayaraq, ölkədə humanitar vəziyyət ağır olaraq qalır.
QHT.az xəbər verir ki, bu barədə “Sərhədsiz Həkimlər” (MSF) təşkilatının 24 iyul 2026-cı il tarixli hesabatında bildirilib.
Təşkilatın məlumatına görə, zəlzələlər nəticəsində 5 398 nəfər həyatını itirib, 16 740 nəfər yaralanıb, 17 907 nəfər isə evlərini tərk etmək məcburiyyətində qalıb. Dağıntılar altında qalan 6 462 nəfər xilas edilib.
Zəlzələlər xüsusilə La Quaira ştatı və paytaxt Karakasda ciddi dağıntılara səbəb olub. Rəsmi məlumatlara əsasən, 190 bina tamamilə dağılıb, 895-dən çox tikili isə ciddi zədələnərək uçmaq təhlükəsi ilə üzləşib. Zərər görən obyektlər arasında məktəblər, xəstəxanalar və digər mühüm infrastruktur obyektləri də var. (msf.org)
MSF-in bildirdiyinə görə, minlərlə insan müvəqqəti düşərgələrdə və ya zədələnmiş evlərinin yaxınlığında qurulan çadırlarda yaşayır. Təşkilatın mobil tibbi qrupları son bir ay ərzində 2 217 tibbi konsultasiya həyata keçirib.
Bununla yanaşı, zəlzələdən zərərçəkənlər arasında psixoloji dəstəyə ehtiyac da yüksəkdir. MSF əməkdaşları 113 fərdi psixoloji seans, 323 qrup terapiyası və 1 402 psixoloji maarifləndirmə sessiyası keçirib.
Təşkilat hazırda ən çox zərər çəkən ərazilərdə dörd mobil klinika fəaliyyət göstərir. Klinikalar ilkin tibbi yardım, psixoloji dəstək, səhiyyə maarifləndirilməsi, su və sanitariya xidmətləri göstərir.
MSF həmçinin zərərçəkənlər üçün 5 min litr tutumlu su çəni quraşdırıb, dörd əsas su paylama məntəqəsində dezinfeksiya işlərinə başlayıb və küçələrdə yaşayan ailələrə 5 min şüşə içməli su paylayıb. Təşkilatın məlumatına görə, son bir ay ərzində təxminən 8,5 ton tibbi ləvazimat da bölgəyə çatdırılıb.
