Birləşmiş Millətlər Təşkilatının (BMT) İsveçrənin Cenevrə şəhərində yerləşən tarixi qərargahında genişmiqyaslı yenidənqurma və müasirləşdirmə işləri həyata keçirilir. Təxminən 1 milyard dollar dəyərində olan layihənin məqsədi binaları bərpa etmək, müasir tələblərə uyğunlaşdırmaq və onların tarixi-memarlıq xüsusiyyətlərini qorumaqdır.
QHT.az xarici mediaya istinadən bildirir ki, BMT-nin Cenevrədəki binaları uzun illər ərzində köhnəlib. Divarların boyası tökülüb, sanitar qovşaqlardakı borular paslanıb, ofis otaqları isə 1960-cı illərin görünüşünü xatırladır. Bu vəziyyətin dəyişdirilməsi məqsədilə BMT-nin Strateji İrs Planı (Strategic Heritage Plan – SHP) çərçivəsində genişmiqyaslı layihəyə başlanılıb.
Layihə çərçivəsində tarixi Millətlər Sarayının (Palais des Nations) infrastrukturu yenilənir, köhnəlmiş sistemlər bərpa olunur və binanın müasir dövrün tələblərinə uyğunlaşdırılması həyata keçirilir. İşlər zamanı əvvəllər görünməyən və gizli qalmış infrastruktur elementləri də üzə çıxarılır.
Layihənin rəhbəri David McCuaig bildirib ki, əsas məqsəd BMT-nin tarixi qərargahını müasirləşdirməklə yanaşı, onun memarlıq irsini qorumaqdır. Bununla belə, genişmiqyaslı işlərin ciddi büdcə məhdudiyyətləri şəraitində həyata keçirilməsi müəyyən çətinliklər yaradır.
Yenidənqurma layihəsi BMT-nin Cenevrədəki qərargahının XXI əsrin tələblərinə uyğunlaşdırılması və gələcək nəsillər üçün qorunması baxımından mühüm əhəmiyyət daşıyır.
