HƏMAS Fələstin hakimiyyətini beynəlxalq platformalarda İsrailə qarşı tədbirləri gücləndirməyə çağırıb.
QHT.az xəbər verir ki, HƏMAS Siyasi Bürosunun sədr müavini Saleh əl-Aruri Qəzzada fələstinli qrupların işğal altında olan Şərqi Qüds və İordan çayının qərb sahilinin sakinlərinə dəstək məqsədilə təşkil etdiyi toplantıda video konfrans vasitəsilə iştirak edib.
Aruri, Fələstin Azadlıq Təşkilatının (FAT) və Fələstin rəhbərliyinin İsraili məsuliyyətə cəlb etmək və pozuntularına görə beynəlxalq platformalarda mühakimə etmək üçün hərəkətə keçməsinin son dərəcə vacib olduğunu bildirib.
Bu kontekstdə o, Beynəlxalq Cinayət Məhkəməsinə və Birləşmiş Millətlər Təşkilatının İnsan Haqları Şurasına müraciət etməyə çağırıb.
ABŞ və İsrail bəzi tərəflərə "İordan çayının qərb sahilində gərginliyin artması Fələstin xalqının itirəcəyi böyük bir müharibəyə səbəb olacaq" təkliflərinə reaksiya verən Aruri fələstinlilərdən müqaviməti artırmalarını və yerdə boykot etmələrini istəyib.
Aruri həmçinin yeni İsrail hökumətinin yəhudi məskənlərini genişləndirmək və İordan çayının qərb sahili sakinlərini öz torpaqlarından köçürmək səylərinə reaksiya verib.
İsrail Təhlükəsizlik Kabineti bu gün İsrail qanunlarına əsasən işğal altındakı İordan çayının qərb sahilində 9 qeyri-qanuni yəhudi məskəninin “leqallaşdırılmasını” təsdiqləyib.
İsrailin işğal etdiyi Fələstin ərazisindəki bütün yəhudi məskənləri beynəlxalq hüquqa əsasən qeyri-qanuni sayılır.
Bunların əksəriyyəti İsrail hakimiyyəti tərəfindən planlaşdırılıb, kiçik olanların bəziləri isə qeyri-qanuni yollarla yəhudi köçkünlər tərəfindən tikilib.
Zaman-zaman İsrail hakimiyyəti bu qeyri-qanuni məskunlaşmaları öz qanunları əsasında rəsmiləşdirərək yəhudi məskənlərini genişləndirməyə davam edir.
