Çində ofis əməkdaşları arasında “ofis qocalması” qorxusu yeni sosial media trendinə səbəb olub. İş yerindəki işıqların və kompüter ekranlarının yaydığı ultrabənövşəyi (UV) şüalardan qorunmaq istəyən bəzi əməkdaşlar masalarının üzərində günəş çətirləri açmağa başlayıblar. Görüntülər sosial şəbəkələrdə qısa müddətdə viral olub. Bəs ofis işıqları həqiqətən də dərinin daha tez qocalmasına səbəb olurmu?
QHT.az xarici mediaya istinadən bildirir ki, uzun iş saatları, stress, yuxusuzluq, kondisionerli və quru hava kimi ofis həyatına xas amillər dərinin daha quru, solğun və yorğun görünməsinə səbəb ola bilər. Son dövrlərdə sosial mediada “ofis qocalması” adlandırılan bu vəziyyət tibbi diaqnoz hesab olunmasa da, ofis mühitinin dəri sağlamlığına təsiri ilə bağlı suallar yaradıb.
Dermatologiya mütəxəssisi dosent Elif Afacan Yıldırım bildirir ki, “ofis qocalması” elmi baxımdan qəbul edilmiş dermatoloji anlayış deyil. Onun sözlərinə görə, bu ifadə son dövrlərdə sosial mediada yayılıb və əsasən iş yerində uzun müddət qalmaq, stress, yuxusuzluq, quru və kondisionerli mühit, hərəkətsizlik və gün ərzində uzun müddət ekran qarşısında olmaq kimi amillərin dəridə yaratdığı görünüş dəyişikliklərini ifadə edir.
Mütəxəssis qeyd edir ki, kompüter ekranını günəşlə eyniləşdirmək düzgün deyil. Kompüter və digər ekranların yaydığı işıq günəş şüaları ilə eyni səviyyədə ultrabənövşəyi şüalanma mənbəyi hesab edilmir. Buna görə də ofisdə kompüter qarşısında işləməyi birbaşa günəş altında qalmaqla müqayisə etmək doğru deyil.
Bununla belə, ofis həyatının bəzi xüsusiyyətləri dərinin vəziyyətinə təsir göstərə bilər. Xüsusilə uzun müddət kondisionerli və aşağı rütubətli mühitdə qalmaq dərinin nəmini azalda, yuxusuzluq və stress isə insanın ümumi görünüşündə yorğunluq əlamətlərini daha nəzərəçarpan edə bilər.
Mütəxəssislərin fikrincə, “ofis qocalması” ifadəsini dərinin birbaşa ofis işıqları səbəbindən qocalması kimi qəbul etmək düzgün deyil. Daha çox ofis həyatının yaratdığı mühit və həyat tərzi faktorlarının dərinin görünüşünə təsirindən danışmaq mümkündür.
