Revmatoloq Aslıhan Avanoğlu Güler oynaq iltihabının yalnız yaşlı insanlarda deyil, gənclərdə və uşaqlarda da yarana biləcəyini bildirib. Mütəxəssis xüsusilə uzun müddət davam edən oynaq ağrıları, səhər sərtliyi və şişkinliklərin diqqətdən kənarda qalmamalı olduğunu vurğulayıb.
QHT.az xarici mediaya istinadən bildirir ki, həkimin sözlərinə görə, iltihablı artrit növlərinin vaxtında aşkarlanmaması və müalicəsinin gecikdirilməsi oynaqlarda qalıcı zədələnmələrə və hərəkət məhdudiyyətinə səbəb ola bilər.
Hansı əlamətlərə diqqət yetirilməlidir?
Aslıhan Avanoğlu Güler bildirib ki, artritin yalnız yaşlı insanlarda yarandığı düşüncəsi xəstəliyin vaxtında aşkarlanmasına mane ola bilər. Revmatizm xəstəliklərindən olan revmatoid artrit və psoriatik artrit gənc və orta yaşlı insanlarda da müşahidə edilə bilər.
Mütəxəssis uzun müddət davam edən oynaq ağrılarının yaşlanmanın təbii nəticəsi kimi qiymətləndirilməməsinin vacibliyini qeyd edib.
Həkim xüsusilə aşağıdakı əlamətlərə diqqət yetirməyi tövsiyə edib:
- Səhərlər 30 dəqiqədən çox davam edən oynaq sərtliyi;
- Əl və ayaqların kiçik oynaqlarında şişkinlik;
- İstirahət zamanı da davam edən oynaq ağrıları.
Bu əlamətlər öz-özlüyündə artrit diaqnozunu təsdiqləməsə də, revmatoloq müayinəsinə ehtiyac olduğunu göstərə bilər.
Mütəxəssislər erkən diaqnozun və vaxtında müalicənin oynaqların sağlamlığını qorumaq, qalıcı zədələnmələrin və hərəkət məhdudiyyətinin qarşısını almaq baxımından mühüm əhəmiyyət daşıdığını bildirirlər.
