ABŞ Prezidenti Donald Trampın administrasiyası xarici yardım strategiyasında dini təşkilatlara, xüsusilə xristian qurumlarına mühüm yer verir. Bu çərçivədə ABŞ Dövlət Departamenti yay aylarında qlobal səhiyyə və humanitar xidmətlər göstərən dini və icma təşkilatlarına təxminən 2 milyard dollar məbləğində maliyyə ayrıldığını açıqlayıb.
QHT.az xarici mediaya istinadən bildirir ki, “makro mükafatlar” və ya “qlobal mükafatlar” adlandırılan bu maliyyə paketləri ABŞ-nin xarici yardım siyasətində dini təşkilatların rolunu artırır. İndiyədək maliyyə alan təşkilatların hamısının xristian qurumları olması vəsaitlərin bölüşdürülməsi, təşkilatların seçilmə meyarları və onların digər qurumlarla müqayisədə üstünlükləri barədə suallar doğurub.
“World Vision” təşkilatından Marqaret Şuler və “Catholic Relief Services” təşkilatından Devid Kronin “Devex Pro Briefing” müzakirəsində iştirak edərək təmsil etdikləri qurumlara ayrılan maliyyənin xüsusiyyətləri və ABŞ Dövlət Departamenti ilə əməkdaşlıq barədə məlumat veriblər.
Müzakirədə dini təşkilatların beynəlxalq humanitar yardım və səhiyyə xidmətlərindəki rolu, maliyyələşmə mexanizmləri və bu qurumların qlobal yardım fəaliyyətindəki üstünlükləri diqqət mərkəzində olub.
