"Xəstəliklə mübarizə çox zaman düşündüyümüz kimi yalnız müalicə mərhələsində başlamır. Əsl mübarizə daha əvvəl — insanın xəstəlik haqqında məlumat aldığı, əlamətləri tanıdığı və vaxtında addım atdığı anda başlayır. Vərəm kimi yoluxucu və sosial əhəmiyyətli xəstəliklərdə erkən diaqnostika və profilaktika təkcə mühüm addım deyil, bütün müalicə strategiyasının əsasını təşkil edir".
QHT.az xəbər verir ki, bu sözləri "Vərəmsiz Gələcəyə Doğru" İctimai Birliyinin sədri Çingiz Ramazanlı bildirib. Onun sözlərinə görə,apardıqları fəaliyyətlər zamanı bir reallıqla tez-tez qarşılaşırıq: insanlar vərəm haqqında nə qədər az məlumatlı olurlarsa, bir o qədər gec həkimə müraciət edirlər. İlk əlamətlər çox vaxt ciddiyə alınmır, adi yorğunluq və ya mövsümi xəstəlik kimi qəbul edilir. Bu gecikmə isə həm xəstəliyin ağırlaşmasına, həm də ətrafdakı insanların risk altına düşməsinə səbəb olur:
"Məhz buna görə təşkilatımız fəaliyyətinin əsas istiqamətlərindən biri kimi maarifləndirməni seçib. Bizim üçün maarifləndirmə sadəcə faktları sadalamaq deyil. Bu, insanlara vərəmin müalicə olunduğunu anlatmaq, qorxunu azaltmaq, yanlış təsəvvürləri aradan qaldırmaq və vaxtında qərar vermək üçün onlara güvən verməkdir. Məktəblərdə, icmalarda, gənclər arasında və müxtəlif sosial qruplarla keçirdiyimiz görüşlərdə biz açıq və sadə dildə danışırıq. İnsanlara vərəmin əlamətlərini necə tanımaq lazım olduğunu, profilaktik müayinələrin niyə vacib olduğunu və erkən diaqnostikanın müalicə prosesini necə asanlaşdırdığını izah edirik. Bu görüşlər zamanı aldığımız suallar və reaksiyalar göstərir ki, düzgün məlumat insanın münasibətini dəyişir".
QHT sədri həmçinin bildirib ki, fəaliyyətimiz nəticəsində bir çox hallarda insanlar vaxtında müayinəyə yönləndirilib, risk qrupunda olan şəxslər erkən mərhələdə aşkarlanıb. Daha da önəmlisi odur ki, maarifləndirmə tədbirlərindən sonra vərəmə qarşı stigma zəifləyib. İnsanlar bu xəstəliyə qorxu və utanc hissi ilə deyil, məlumat və anlayışla yanaşmağa başlayıblar:
"Əldə etdiyimiz təcrübə göstərir ki, erkən diaqnostika və profilaktika yalnız səhiyyə sisteminin üzərinə düşən vəzifə deyil. Bu prosesdə vətəndaş cəmiyyəti təşkilatlarının rolu xüsusilə vacibdir. “Vərəmsiz Gələcəyə Doğru” İctimai Birliyi olaraq biz səhiyyə qurumları ilə icmalar arasında körpü rolunu oynayaraq, məlumatı birbaşa insana çatdırmağa davam edirik. Biz inanırıq ki, maarifləndirmə ilə qorunan cəmiyyət daha sağlam və daha güclü olur. Bir insana vaxtında verilən düzgün məlumat bəzən bir həyatın, bəzən isə bütöv bir ailənin xəstəlikdən qorunmasına səbəb olur. Erkən diaqnostika, davamlı profilaktika və məqsədyönlü maarifləndirmə — vərəmin yayılmasının qarşısını alan ən effektiv müalicə strategiyası məhz budur".
