Xarici QHT-lər ənənəvi donor maliyyəsinin azalması, siyasi məhdudiyyətlərin artması və ictimai etimadın zəifləməsi fonunda fəaliyyətlərini yenidən qurmağa çalışırlar.
QHT.az xarici mediaya istinadən bildirir ki, “QHT-lərin mürəkkəb dövrdə fəaliyyət göstərməsi” mövzusunda yayımlanan yeni yazıda qeyri-hökumət təşkilatlarının qarşılaşdığı əsas problemlərə diqqət çəkilib.
Məlumata görə, son dövrlərdə bir sıra QHT-lər üçün ənənəvi donor maliyyəsinə çıxış çətinləşib. Bununla yanaşı, vətəndaş cəmiyyətinə qarşı siyasi və inzibati məhdudiyyətlərin artması təşkilatların fəaliyyət imkanlarını daraldır.
Qeyd olunur ki, artan humanitar və sosial ehtiyaclara baxmayaraq, beynəlxalq yardım və maliyyə resurslarının azalması QHT-ləri alternativ maliyyələşmə yolları axtarmağa vadar edir. Bəzi təşkilatlar yerli tərəfdaşlarla daha sıx əməkdaşlığa, rəqəmsal ianə toplama üsullarına və sosial sahibkarlıq modellərinə yönəlirlər.
Yazıda QHT-lərin qarşılaşdığı digər mühüm problemin ictimai etimad məsələsi olduğu vurğulanır. Təşkilatların fəaliyyətinin nəticələri, şəffaflığı və cəmiyyət qarşısında hesabatlılığı ilə bağlı suallar onların nüfuzuna təsir göstərir.
Ekspert yanaşmalarına əsasən, yeni şəraitdə QHT-lərin fəaliyyətini davam etdirməsi üçün maliyyə mənbələrinin şaxələndirilməsi, təşkilatlararası əməkdaşlığın gücləndirilməsi, innovativ yanaşmaların tətbiqi və yerli icmalarla daha sıx əlaqələrin qurulması vacibdir.
Məqalədə bildirilir ki, qarşıdakı dövrdə QHT-lər daha az resursla daha çox ehtiyaca cavab vermək məcburiyyətində qala bilər. Bu isə təşkilatlardan çevik, davamlı və uzunmüddətli fəaliyyət modelləri formalaşdırmağı tələb edir.
