Gecə yuxusu zamanı işığa məruz qalmaq ürəyin quruluşu və fəaliyyətində potensial olaraq zərərli dəyişikliklərə səbəb ola bilər.
QHT.az xarici mediaya istinadən bildirir ki, “European Heart Journal”da dərc olunan yeni araşdırmada gecə işığı ilə ürək-damar sağlamlığı arasındakı əlaqə araşdırılıb.
Əvvəlki tədqiqatlarda gecə işığında yatmaqla koronar arteriya xəstəliyi, infarkt, ürək çatışmazlığı və insult riskinin artması arasında əlaqə olduğu müəyyən edilib. Yeni araşdırma isə gecə işığının ürəyin quruluşu və fəaliyyətinə necə təsir göstərə biləcəyini araşdıran ilk tədqiqatlardan biridir.
Tulane Universitetinin tədqiqatçısı, araşdırmanın baş müəllifi Dr. Lu Qi bildirib ki, ürəkdə müşahidə olunan struktur dəyişiklikləri gecə vaxtı həddindən artıq işığa məruz qalma ilə əlaqələndirilən ürək-damar problemlərinin riskini izah etməyə kömək edə bilər.
Araşdırma çərçivəsində ilkin mərhələdə ürək-damar xəstəliyi olmayan 11 071 iştirakçının məlumatları təhlil edilib. İştirakçılar müəyyən müddət ərzində biləklərində işıq və hərəkət sensorları daşıyıblar. Bir neçə il sonra onların ürəkləri maqnit-rezonans tomoqrafiyası (MRT) vasitəsilə müayinə olunub.
Tədqiqatçılar gecə yuxusu zamanı demək olar ki, heç bir işığa məruz qalmayan şəxslərlə çox zəif otaq işığı səviyyəsinə uyğun gələn daha güclü işıq mənbələrinə məruz qalan şəxsləri müqayisə ediblər.
Mütəxəssislərin nəzərdən keçirdiyi mümkün işıq mənbələri arasında pəncərədən daxil olan küçə lampalarının işığı, elektron saatların işıqları və elektron cihazlardakı LED indikatorlar da olub.
Araşdırma nəticələri gecə yuxusu zamanı işıq məruz qalmasının ürək-damar sağlamlığı baxımından nəzərə alınmalı amillərdən biri ola biləcəyini göstərir.
