İsrail hökumətinin 2013-cü ildə dünyanın müxtəlif ölkələrində fəaliyyət göstərən humanitar və insan haqları təşkilatları barədə məlumat topladığını göstərən daxili sənəd üzə çıxıb.
QHT.az xarici mediaya istinadən bildirir ki, Al Jazeera-nın əldə etdiyi sənəddə 150-dən çox QHT barədə rəhbərlərin adları, əlaqə məlumatları və fəaliyyət istiqamətləri qeyd olunub. Təşkilatlardan bəziləri isə İsraili tənqid etmək, anti-İsrail kampaniyalarında iştirak etmək və ya BDS hərəkatına dəstək vermək kimi qeydlərlə təsnifləndirilib.
Sənəddə Oxfam, Medical Aid for Palestinians, World Vision International, Norwegian Refugee Council və digər beynəlxalq təşkilatların adları yer alıb. Məsələn, İspaniyanın Mundubat təşkilatı “BDS-də yüksək səviyyədə iştirak edən” qurum kimi qeyd olunub.
Sənəddəki məlumatların bir hissəsinin İsraildə fəaliyyət göstərən NGO Monitor təşkilatının araşdırmalarına əsaslandığı bildirilir. Al Jazeera-nın məlumatına görə, sənəd 2013-cü ilin oktyabrında, BDS hərəkatının beynəlxalq səviyyədə genişləndiyi dövrdə hazırlanıb. (Al Jazeera)
QHT nümayəndələri isə bu cür məlumat toplama fəaliyyətinin təhlükəsizlik məqsədi daşımadığını və humanitar təşkilatların fəaliyyətinin siyasi baxımdan izlənildiyini bildiriblər.
Oxfam sənəddəki iddiaları qəbul etməyərək BDS hərəkatını dəstəkləmədiyini açıqlayıb. Digər bəzi təşkilatlar isə Fələstinlilərin hüquqlarını müdafiə etdiklərini və İsrailin siyasətini tənqid etməyin onların fəaliyyətinin bir hissəsi olduğunu bildiriblər.
Mütəxəssislərin fikrincə, sənəd İsrailin QHT-lərə və BDS hərəkatına qarşı sonrakı siyasətinin formalaşma mərhələsinə işıq sala bilər. 2017-ci ildə İsrail BDS hərəkatını dəstəkləyən şəxslərin ölkəyə girişinə məhdudiyyət qoyan qanun qəbul etmişdi.
