İsveçdə Quran yandırma aksiyalarının təşkilatçısı Salvan Momika Norveçdə saxlanılıb və İsveçə geri deportasiya edilir.
QHT.az xəbər verir ki, həbs martın 28-də Momika İsveç mediasına Norveçə sığınacaq istəmək üçün getdiyini dedikdən sonra baş verib. Norveç məhkəməsinin yazdığı kimi, “deportasiya rəsmi və praktiki tədbirlər görülən kimi həyata keçiriləcək”.
Fevralın əvvəlində İsveç Miqrasiya Məhkəməsi Momikanın onu deportasiya etmək barədə Miqrasiya Agentliyinin qərarından şikayətini rədd edib. Məhkəmənin qərarı onun İsveçdə yaşamaq icazəsini ləğv edir. Fəalın 5 il müddətinə ölkəyə girişi də qadağan edilib.
2023-cü ilin oktyabrında Miqrasiya Agentliyi Momikanın ərizəsində özü haqqında yanlış məlumat verdiyini əsas gətirərək onun yaşayış icazəsini yeniləməkdən imtina edib. Ona ilkin olaraq İşgəncələr Konvensiyasına əsasən İsveçdə qalmağa icazə verilib. Momika daha əvvəl yanlış məlumat vermək ittihamının həqiqətə uyğun olmadığını bildirib.
