Google Play mağazasında WhatsApp-ın adını və görüntüsünü təqlid edən saxta tətbiq 500 mindən çox yüklənib. Məlumata görə, tətbiq bəzi axtarış nəticələrində reklam kimi istifadəçilərə təqdim olunur.

“Android Authority” nəşrinin oktyabrın 16-da yayımladığı araşdırmada saxta tətbiqin Google Play-də geniş yayıldığı bildirilib.

QHT.az xarici mediaya istinadən bildirir ki, WhatsApp-ın rəsmi Android tətbiqini axtaran istifadəçilər eyni addan və oxşar vizual elementlərdən istifadə edən saxta proqramla qarşılaşa bilərlər. Nəşr bəzi axtarışlarda saxta tətbiqin reklam bölməsində göründüyünü qeyd edib. Bununla belə, aparılan yoxlama zamanı rəsmi WhatsApp tətbiqi ilk sırada yer alıb.

Xəbərdə saxta tətbiqdə zərərli proqram təminatının aşkarlandığını təsdiqləyən konkret sübut təqdim edilməyib.

İstifadəçilərə tətbiqləri yükləyərkən proqramın tərtibatçısını, rəsmi mənbəyini və yüklənmə məlumatlarını diqqətlə yoxlamaq tövsiyə olunur.