Çay və qəhvə kimi isti içkiləri həddindən artıq yüksək temperaturda müntəzəm qəbul etmək yemək borusu xərçəngi riskini artıra bilər.
QHT.az xarici mediaya istinadən bildirir ki, araşdırma İngiltərədə təxminən 1 milyon insanın məlumatları əsasında aparılıb. Nəticələrə görə, içkilərini “çox isti” qəbul edən şəxslərdə yemək borusu xərçənginə tutulma riski ilıq içki içənlərlə müqayisədə təxminən üç dəfə yüksək olub.
Oxford Universitetinin apardığı və “International Journal of Cancer” jurnalında dərc olunan araşdırmada 65 dərəcə Selsi və daha yüksək temperaturda olan içkilər “çox isti” hesab edilib.
Tədqiqat 977 min 282 orta yaşlı qadın və kişinin məlumatlarını əhatə edib. Gündə altı və ya daha çox fincan isti içki qəbul etməyin də risklə əlaqəli olduğu müəyyənləşdirilib.
Mütəxəssislər bildirirlər ki, çox isti mayenin müntəzəm olaraq qəbul edilməsi yemək borusunun daxili səthini zədələyə və hüceyrələrdə dəyişikliklərə səbəb ola bilər.
Yeni dəmlənmiş çayın temperaturu 100 dərəcəyə yaxın ola bilər. Fincana töküldükdən sonra isə adətən 90–95 dərəcəyə qədər soyuyur. Buna görə mütəxəssislər içkini qəbul etməzdən əvvəl bir neçə dəqiqə gözləməyi tövsiyə edirlər.
Süd əlavə etmək içkinin temperaturunu müəyyən qədər azalda bilər. Lakin süd əlavə olunmuş çay və ya qəhvə də kifayət qədər isti qala bilər.
Əsas risk faktorları siqaret və alkoqoldur
Mütəxəssislər vurğulayırlar ki, çox isti içkilərlə bağlı riskə baxmayaraq, yemək borusu xərçənginin əsas risk faktorları arasında siqaret və yüksək miqdarda alkoqol qəbulu daha mühüm yer tutur.
Xəstəliyin mümkün əlamətləri arasında udma çətinliyi, boğaz və ya döş qəfəsində ağrı, davamlı həzmsizlik və mədə yanması, eləcə də səbəbsiz çəki itkisi göstərilir.
Mütəxəssislər sağlamlıq risklərini azaltmaq üçün siqaretdən uzaq durmağı, alkoqol qəbulunu məhdudlaşdırmağı və çox isti içkiləri bir qədər soyuduqdan sonra qəbul etməyi tövsiyə edirlər.
