Qarabağ bölgəsinin bərpası və inkişafı, Azərbaycanın sosial rifahını artırmaq üçün kritik bir mərhələdir. Bu kontekstdə, QHT.az Vətəndaşların Sosial Rifahı Naminə İctimai Birliyinin sədri İradə Rizazadə ilə apardığı müsahibədə, Qarabağ Universitetinin açılışının əhəmiyyəti, məcburi köçkünlərin sosial uyğunlaşması və təhsil sahəsindəki prioritetlər haqqında fikirlərini öyrəndi. İradə Rizazadə, təşkilatın gələcək planlarını və Qarabağda sosial rifahın artırılması istiqamətində atılacaq addımları paylaşdı. Müsahibə, bölgədəki inkişafın həm tarixi, həm də sosial aspektlərini əhatə edir.
QHT.az: Qarabağ Universitetinin açılışını necə qiymətləndirirsiniz? Bu, məcburi köçkünlərin sosial rifahına və təhsil imkanlarına hansı təsirləri göstərə bilər?
İradə Rizazadə: Qarabağ Universitetinin açılması, həm tarixi haqqın bərpası, həm də sosial inkişafın təminatı baxımından çox önəmlidir. Bu universitetin yaradılması bölgənin kadr potensialının formalaşmasına böyük töhfə verəcək. Məcburi köçkünlərin bu universitetdə təhsil alması, onlara doğma torpaqlarında işləmək imkanları yaradacaq, işsizlik problemini aradan qaldıraraq sosial inkişafı sürətləndirəcək.
QHT.az: Vətəndaşların sosial rifahını yaxşılaşdırmaq üçün təhsil sahəsində hansı prioritet addımlar atılmalıdır? Xüsusən, məcburi köçkünlər və şəhid ailələri üçün hansı xüsusi təhsil dəstəyi təklif edərdiniz?
İradə Rizazadə: Təhsil sahəsində savadlı kadrların yetişdirilməsi vacibdir. Biz, gələcəkdə Qarabağda peşə yönümlü kurslar açmağı, iş yerləri yaratmağı və donorları cəlb etməyi planlaşdırırıq. Bu yanaşma, sosial problemlərin həllində və insanların sosial rifahının artırılmasında daha təsirli olacaq.
QHT.az: Məcburi köçkünlərin Qarabağa qayıdış prosesi davam edərkən, onların sosial uyğunlaşmasını təmin etmək üçün əsas prioritetlər nədir?
İradə Rizazadə: Məcburi köçkünlərin qayıdışını sürətləndirmək üçün yeni yolların tikilməsi, müasir yaşayış evləri və məktəblərin inşası prioritetdir. Bu infrastruktur inkişafı, köçkünlərin iqtisadiyyatda, xüsusən də kənd təsərrüfatında fəal iştirakını təmin edəcək.
QHT.az: İctimai Birlik bu istiqamətdə hansı tədbirlər görür və gələcəkdə hansı addımları atmağı planlaşdırır?
İradə Rizazadə: Biz, Qarabağda sosial rifahın artırılması istiqamətində həyata keçirdiyimiz layihələrdə aktiv iştirak edirik. Sosial problemlərin həlli üçün peşə yönümlü kursların açılması, iş yerlərinin yaradılması və donorların cəlb edilməsi bizim məqsədimizdir. Gələcəkdə bu layihələri daha da irəlilətməyi planlaşdırırıq.
Pərvanə Fərhadqızı
QHT.az
