Qaraqalpaqıstan Respublikasının To‘rtko‘l rayonunda korrupsiyaya qarşı mübarizə məqsədilə həyata keçirilən “Halollik adası” metodologiyasının tətbiqinin ikinci mərhələsinə başlanılıb.
QHT.az xəbər verir ki, layihənin genişləndirilməsində əsas məqsəd bölgələrdə korrupsiyadan uzaq idarəetmə mühiti formalaşdırmaq, dövlət qulluqçularında məsuliyyət və aidiyyət hissini gücləndirmək, həmçinin əhalinin dövlət institutlarına olan etimadını artırmaqdır. Tədbirin davamı olaraq Nukus şəhərində yerləşən “QHT-lər evi"ndə Ali Məclisin nəzdində fəaliyyət göstərən İctimai Fond tərəfindən elan olunmuş “Korrupsiyaya qarşı mübarizədə qeyri-hökumət təşkilatlarının rolu” mövzusunda qrant müsabiqəsinin qalibləri öz layihələrini təqdim ediblər.
Təqdimatlar zamanı yerli büdcə vəsaitlərinin xərclənməsi və dövlət proqramlarının icrasına QHT-lərin iştirakı ilə ictimai nəzarətin gücləndirilməsi, əhali arasında korrupsiyaya qarşı barışmaz münasibət mədəniyyətinin formalaşdırılması, eləcə də insan amilinin azaldılması yolu ilə korrupsiya risklərinin minimuma endirilməsinə yönəlmiş sosial təşəbbüslər diqqət mərkəzində olub.
Qeyd olunub ki, bu görüş yalnız görülmüş işlərin yekunlaşdırılması deyil, eyni zamanda Qaraqalpaqıstanın sosial-iqtisadi xüsusiyyətləri nəzərə alınmaqla “Halollik adası” metodologiyasının daha da təkmilləşdirilməsi üçün qarşılıqlı təcrübə mübadiləsi platforması rolunu oynayır.
