QHT.az xəbər verir ki, yeni elmi araşdırma şəkərli qazlı və digər şirin içkilərin müntəzəm qəbulunun yüksək qan təzyiqi riskini əhəmiyyətli dərəcədə artırdığını göstərib.
Tədqiqatın nəticələrinə görə, hər gün şəkərlə zəngin içkilərdən istifadə edən insanlarda hipertoniya inkişaf etmə ehtimalı bu içkiləri nadir hallarda qəbul edənlərlə müqayisədə 52 faiz daha yüksəkdir. Alimlər hesab edirlər ki, əlavə şəkərin həddindən artıq qəbulu çəki artımı, iltihabi proseslər və qan damarlarının fəaliyyətinin pozulması ilə əlaqəli olduğundan ürək-damar sağlamlığına mənfi təsir göstərir.
Mütəxəssislər bildirirlər ki, susuzluğu yatırmaq üçün əsas seçim su olmalı, şəkərli içkilərin istehlakı isə mümkün qədər məhdudlaşdırılmalıdır. Onların sözlərinə görə, sağlam qidalanma, fiziki aktivlik və duz qəbulunun azaldılması da qan təzyiqinin nəzarətdə saxlanmasına kömək edir.
Həkimlər xüsusilə ürək-damar xəstəlikləri riski olan şəxslərə gündəlik qida rasionunda şəkərli içkiləri azaltmağı və mütəmadi olaraq arterial təzyiqi yoxlamağı tövsiyə edirlər.
