ABŞ-da 17 mindən çox kişinin məlumatlarının təhlili ultra emal olunmuş qidaların yüksək istehlakı ilə prostat xərçəngi arasında mümkün əlaqəni ortaya qoyub.
QHT.az xarici mediaya istinadən bildirir ki, Florida Atlantik Universitetinin tədqiqatçıları 2003–2023-cü illər arasında ABŞ-da aparılan sağlamlıq və qidalanma sorğularında iştirak edən 17 024 kişinin məlumatlarını araşdırıblar. Tədqiqatda qazlı içkilər, qablaşdırılmış səhər yeməyi məhsulları, müxtəlif qəlyanaltılar və emal olunmuş ət məhsulları ultra emal olunmuş qidalar kimi qiymətləndirilib.
Nəticələrə görə, gündəlik kalori qəbulunun 20 faizindən azını ultra emal olunmuş qidalardan alan kişilərlə müqayisədə daha çox belə məhsul istehlak edənlərdə prostat xərçəngi riski təxminən 29 faiz yüksək olub. Ən yüksək istehlak qrupunda isə risk 30 faizədək artıb.
Tədqiqatçılar yaş, siqaret çəkmə, sosial-iqtisadi vəziyyət və digər amilləri nəzərə aldıqdan sonra da əlaqənin davam etdiyini bildiriblər. Bununla belə, mütəxəssislər nəticələrin ultra emal olunmuş qidaların prostat xərçənginə birbaşa səbəb olduğunu sübut etmədiyini, yalnız mümkün əlaqəni göstərdiyini vurğulayıblar.
