91 yaşlı Deyl Sanders Appalachian cığırını tamamlayaraq bu rekordu yenidən öz adına çıxarıb. Sandersin sözlərinə görə, 2 193 mil (3 530 kilometr) uzunluğundakı yürüş zamanı 71 dəfə yıxılıb. Altı yıxılma ciddi olub, onlardan biri qısa müddət xəstəxanada qalmasına səbəb olub.
QHT.az xarici mediaya istinadən bildirir ki, Sanders yürüşə sentyabrın 6-da Qərbi Virciniyadan başlayıb və bazar ertəsi Men ştatının ən yüksək zirvəsi olan Katahdin dağına çataraq yürüşü tamamlayıb. Zirvədə dayanaraq Tanrıya və ona dəstək olan insanlara təşəkkür edib.
“Grey Beard” ləqəbi ilə tanınan Sanders ilk dəfə 2017-ci ildə, 82 yaşında Appalachian cığırını tamamlayan ən yaşlı yürüşçü olub. Dörd il sonra 83 yaşlı dostu M.C. Eberhart bu rekordu ondan alıb. Sanders isə rekordu geri qaytarmaq üçün yenidən yürüşə başlayıb.
Yürüş zamanı Sanders bir neçə dəfə ciddi çətinliklərlə üzləşib. Vermontda yıxılaraq qol və ayaqlarını yaralayıb, daha sonra sol qolunun keyləşməsi səbəbilə xəstəxanaya yerləşdirilib. Həkimlər bunun insult deyil, sinir sıxılması olduğunu müəyyən ediblər.
