ABŞ-ın Pensilvaniya Universitetinin alimləri tərəfindən aparılan yeni araşdırma göstərib ki, piylənmə və 2-ci tip diabetin müalicəsində istifadə olunan GLP-1 qrupuna aid dərmanlar saç tökülməsi riskini artıra bilər.
QHT.az xarici mediaya istinadən bildirir ki, araşdırmanın nəticələri The BMJ elmi jurnalında dərc olunub. Tədqiqat çərçivəsində Ozempic və Wegovy kimi GLP-1 preparatları digər iki geniş yayılmış diabet dərman qrupu – SGLT-2 və DPP-4 inhibitorları ilə müqayisə edilib.
12 mindən çox GLP-1 istifadəçisinin məlumatlarının təhlili nəticəsində məlum olub ki, bu preparatlardan istifadə edən şəxslərdə saç tökülməsi riski SGLT-2 inhibitorlarından istifadə edənlərlə müqayisədə 37 faiz, DPP-4 inhibitorlarından istifadə edənlərlə müqayisədə isə 68 faiz daha yüksəkdir.
Tədqiqat müəllifləri qeyd ediblər ki, müşahidə olunan saç tökülməsi əsasən çapıq qoymayan alopesiya növünə aiddir. Bu isə saçların müəyyən müddətdən sonra yenidən çıxma ehtimalının yüksək olduğunu göstərir.
Mütəxəssislərin fikrincə, GLP-1 preparatlarının səbəb olduğu sürətli çəki itkisi, eləcə də dəmir və sink kimi mineralların səviyyəsindəki dəyişikliklər saçların böyümə dövrünə mənfi təsir göstərə bilər. Bu dəyişikliklər müvəqqəti saç tökülməsi ilə xarakterizə olunan telogen effluvium vəziyyətini də tətikləyə bilər.
Bununla belə, alimlər ümumi riskin aşağı səviyyədə qaldığını vurğulayıblar. Statistikaya əsasən, ildə hər 1000 GLP-1 istifadəçisindən təxminən 7 nəfərində saç tökülməsi müşahidə olunur. Bu göstərici SGLT-2 preparatlarından istifadə edənlərdə 5, DPP-4 inhibitorlarından istifadə edənlərdə isə 4 nəfər təşkil edir.
Tədqiqat müəllifləri hesab edirlər ki, risk aşağı olsa da, həkimlər müalicə zamanı bu mümkün yan təsiri nəzərə almalı və hər bir xəstə üçün fərdi qiymətləndirmə aparmalıdırlar.
