Britaniya Kolumbiyası Universitetinin (UBC) alimləri Salish dənizinin dayaz sularında iki yeni dəniz hörümçəyi növü aşkarlayıblar.
QHT.az xarici mediaya istinadən bildirir ki, yeni növlərdən biri Tanystylum kiixin adlandırılıb. Qırmızı gözləri, üçdodaqlı ağız quruluşu və pençələri ilə seçilən bu canlıların ayaqlarına bənzəyən xüsusi çıxıntıları da var. Tədqiqatçılar mikroskop altında həmin çıxıntılardan istifadə edərək bədənlərini təmizlədiklərini müşahidə ediblər.
Alimlərin məlumatına görə, dəniz hörümçəkləri əslində hörümçək deyil. Onlar hörümçəklər, əqrəblər və atnalı xərçəngləri ilə qohum olan dəniz canlılarıdır.
Tədqiqatçılar bildiriblər ki, Salish dənizində zəngin biomüxtəlifliyə baxmayaraq, burada yalnız 17 dəniz hörümçəyi növü etibarlı şəkildə sənədləşdirilib. Yeni növlərin öyrənilməsi insan fəaliyyəti və iqlim dəyişikliyinin dəniz canlılarına təsirinin araşdırılması baxımından əhəmiyyətli hesab olunur.
Zəhra Mansırova
