Əlləri torpağa salmaq, otlara, ağaclara və yosunlara toxunmaq dəri və ümumi immun sistem üçün müxtəlif sağlamlıq faydaları yarada bilər.
QHT.az xarici mediaya istinadən bildirir ki, demək olar ki, hər gün parklarda uzun gəzintiyə çıxan insanlar müxtəlif ağaclar, çiçəklər və quş səsləri ilə əhatə olunurlar. Lakin bu təcrübə adətən görmə və eşitmə ilə məhdudlaşır. Araşdırmalar isə ağaclara, kollara və torpağa toxunmağın da sağlamlığa müsbət təsir göstərə biləcəyini ortaya qoyur.
Finlandiyanın mərkəzində yerləşən Aurinkolinna uşaq bağçasında uşaqların əllərinin çirkli olması adi haldır. Onlar hər gün bir neçə saatını meşəlik oyun meydançasında keçirir, ağac və kolların arasında qaçır, iplərə dırmaşır, qumdan qalalar qurur, su gölməçələrində oynayır, torpaq və taxta yonqarı ilə təmasda olurlar.
Alimlər bunun uşaqların sağlamlığına təsirini araşdırırlar. Tədqiqatçılar uşaqların dərisində, tüpürcəyində və nəcisindəki mikrobları, həmçinin qan və saç nümunələrini analiz edərək təbiətlə təmasın immun sisteminə təsirini öyrənirlər.
2016–2017-ci illərdə aparılan araşdırmada uşaq bağçasının oyun sahələrindən birinə meşə torpağı gətirilib. Uşaqlar 28 gün ərzində burada mütəmadi oynayıblar. Nəticələr asfalt örtüklü meydançada oynayan uşaqlara nisbətən meşə torpağı ilə təmasda olan uşaqların dərisində bir il sonra daha çox mikrob müxtəlifliyi olduğunu göstərib.
Bu müxtəliflik dəri sağlamlığı üçün əhəmiyyətlidir. Tədqiqatçıların fikrincə, dəridə bakteriya müxtəlifliyinin artması xəstəlik törədən bakteriyaların üstünlük qazanmasının qarşısını alaraq mikrobiomun tarazlığını qorumağa kömək edə bilər.
Tədqiqatçılardan Roslund bunu belə ifadə edir: “Xəstəlik diktator kimidir, sağlam dəri isə demokratiya kimidir”.
Zəhra Mansırova
