ABŞ administrasiyası Gavi, Vaksin Alyansına 600 milyon dollar maliyyə ayıracağını açıqlayıb. Bu qərardan əvvəl Gavi bir ildən çox müddət ərzində ABŞ maliyyəsinin bərpa olunub-olunmayacağı ilə bağlı qeyri-müəyyənlik yaşayırdı.
QHT.az xarici mediaya istinadən bildirir ki, ABŞ Səhiyyə və İnsan Xidmətləri Departamenti Gavi-nin civə tərkibli vaksinlərdən mərhələli şəkildə keçid və daha yeni, civəsiz vaksinlərə çıxışın genişləndirilməsi ilə bağlı öhdəlik götürdüyünü bildirib.
Lakin Gavi-nin daha yeni vaksinlərə keçidi yeni qərar deyil. Təşkilat bu prosesi daha əvvəl ictimai səhiyyə məqsədləri və müasir vaksinlərin üstünlükləri səbəbilə həyata keçirməyə başlayıb.
ABŞ açıqlamasında civəsiz vaksinlərə xüsusi diqqət yetirilməsi Robert F. Kennedinin vaksinlərdə civə ilə bağlı mövqeyi ilə əlaqələndirilsə də, Gavi-nin vaksin keçidinin əsas səbəbi bu deyil.
Gavi-nin əsas məqsədi aşağı gəlirli ölkələrdə insanların vaksinlərə çıxışını artırmaq və yoluxucu xəstəliklərdən qorunmanı gücləndirməkdir. ABŞ-ın 600 milyon dollarlıq maliyyəsinin bərpası da bu proqramların davam etdirilməsi baxımından mühüm hesab olunur.
