Dünyanın ən maraqlı dəniz canlılarından biri hesab edilən “leaf sheep” (Costasiella kuroshimae) son günlər qeyri-adi görünüşü və unikal xüsusiyyəti ilə yenidən gündəmə gəlib.
QHT.az xarici mediaya istinadən xəbər verir ki, cəmi 5-10 millimetr uzunluğunda olan bu kiçik dəniz ilbizi görünüşünə görə balaca qoyunu xatırladır. O, Yaponiya, Filippin və İndoneziya sahillərində yaşayan yaşıl yosunlarla qidalanır.
Canlının ən maraqlı xüsusiyyəti isə qidalandığı yosunların xloroplastlarını öz bədənində saxlamasıdır. Bu proses sayəsində “yarpaq qoyun” günəş işığından enerji əldə edə bilir. Alimlər bu nadir bioloji mexanizmi “kleptoplastiya” adlandırırlar.
Mütəxəssislərin sözlərinə görə, bu xüsusiyyət heyvanlar aləmində olduqca nadir rast gəlinir və “leaf sheep”i elm dünyasının ən maraqlı canlılarından birinə çevirir. Sosial şəbəkələrdə isə onun fotoları milyonlarla baxış toplayaraq istifadəçilərin rəğbətini qazanıb.
