Özbəkistanın Ali Məclisi yanında İctimai Fondun elan etdiyi dövlət qrantı müsabiqəsinə ərizə qəbulu başa çatıb. Müsabiqəyə vətəndaş cəmiyyəti institutlarından ümumilikdə 700 ərizə daxil olub.
Fondun məlumatına görə, Ali Məclis yanında İctimai Fondun aşağıdakı istiqamətlər üzrə elan etdiyi dövlət qrantı müsabiqəsinə ərizə qəbulu başa çatıb:
• Ekoloji mədəniyyətin yüksəldilməsi;
• Layiqli əmək prinsiplərinə riayət olunmasının monitorinqi;
• Əlilliyi olan uşaqlar üçün neyroreabilitasiya xidmətlərinin inkişaf etdirilməsi;
• İstehlakçı hüquqlarının müdafiəsi;
• Məişət korrupsiyasının qarşısının alınmasında “Nəvai təcrübəsi”nin yayılması;
• İnsan alveri qurbanlarının psixoloji reabilitasiyası və peşəyönümü;
• Narkomaniyanın qarşısının alınması;
• İnsan hüquqları sahəsində təhsilin inkişaf etdirilməsi;
• Problemli ailələrlə ünvanlı işin aparılması;
• Regionlardakı məhəllələrin infrastrukturunun yaxşılaşdırılması.
Növbəti mərhələdə ərizələr Parlament komissiyası tərəfindən nəzərdən keçiriləcək və müsabiqənin qalibləri müəyyənləşdiriləcək.
